Ez Qeru rao. Ma Kudu nime. Namê piê mı Uşêno. Usê Dıli. Dılê Alê Qeri Khalıkê mıno. Moa mı Dinaru de ez ardo riê dina. 38 de lacekê mı doman bi. Hesen Efendi vıstewrê mıno.
Bıraê mı, esker ke ame qelebiya na werte, ma Dinaru de bime. Nata bota koti têwerte mal u gay day bi are, ardi bi qelebıti bi na werto, dina kerde sure, kerde tariye. Awe çine biye ke mılet boro. Mıleti taine voz da, taine domonê xo eşti awe. Va ke domoni berbenê, coka domonê xo eşti awe. Ma ki voz da bırr. Ma şime kotime beref. Domonkine de ma uca kotênê awe, şiyenê uca mığara biye, bınê xo awe biye, ma zanıtene ya, şime kotime uca. Eskeru xırxi ki dênê awe ro, a awe pışqiyêne, zov u zêç berbênê, tersênê. Lacê mı Uşen qıc bi, qocia mıde bi. Mordemê ma, ma ke voz da, pêro berdê Arê Ali Bego de qırr kerdê. Bado Welê Alê Dıli şi, kemere vere çeberê arey de biye, raver uca lê a kemere de meyiti dard bi we. Niada ke na rey ki goligu sero gırêdanê, pesewe şi yi meyiti uca ra veti, ardi caê bini de dardi we. Mılet se bıkero, butu goni şiyêne.
Hesen Efendi be Hesê Mışti yine wazenê, yi sonê Turusmege, uca de kuline cênê. Turusmege de cı rê çay anê, Hesen Efendi ke çay sımeno, bırazaê xo İsmail ki lewe de beno. Çay ke sımeno çay sarê xo sero pê xo de erzeno, yanê bırazay rê vano ke bırreme. İsmail usto ra, biyo rast amo, nêzon kami gerre keno, konê dıme, İsmail xo sano zıme, tıfanga nane pı ra, xo kemero erzeno war, remeno, sono xeleşino.
Yi bini day arê berdi. Hesen Efendi ebe xo bi, Hesê Mışti bi, Domanê Hesê Mışti Hese Wuşe bi, cinia Hesen Efendi Fadima biye, berdi Baleşere de qırr kerdi. Yê Hesen Efendi çor domonê xo bi.
Çê ma ra ki danê arê benê, khalıkê mı yine rê vanê “ sıma surgun kenime ” berdê raê ra efe ama, yi serba peru uza nê ro , uza qırr kerdê. Perê xo gureti mêrıki, ey ki qırr kerdi, ca verday ame. Esker sana ver, nêverda ke ma meyitunê xo biyarime. Oda mawa pile ê çê Hesê Mıştia. Hesê Mışti be Hesen Efendia a taw zubini ra heredan bi, eke piya benê, Hesê Mışti Hesen Efendi rê vano:
“Meterse ez pê to dero, ez to fetelnon. ”
Yane perê xo zaf bi, teneke altuni guretê lê xo. Hesê Mışti be Hesen Efendia mordemê zubini ênê, Khuresunê. Hesê Mışti dewleti bi, pere xo bi, Hesen Efendi ki wendoğ bi, Ruştiye mektebi qedıt bi. Piê mı des serri Hamılkan de mendo, jü ke ama ebe zonê İngilizki yi çarnênê Tırki.
Ali Ağaê yi ki na dere de qırr kerdi. Naê bini berdi, Ali Ağaê yi kesê xo çine meyita bero, Usıvu amay, Wuso Şia yi amey, meyitê xo berdi, yi sılxet bi zona. Ali Ağaê yi ki isonê ma berdi uca dardi we, sere AliAğay de. Tornê tornonê xo amey, mezeli vıraşti.